中環出更：鄧慶治無特權排隊歎豚王
喺中環嘅拉麵王「豚王」日日排長龍，無論邊個貴客都無得拉關係走後門，就算係老闆嘅爸爸佳能高級副總裁鄧慶治(Mingo)，都一樣要排隊。尋日Mingo同擔任主禮嘉賓嘅前經濟發展及勞工局局長葉澍堃一齊出席香港童軍一百周年慶祝活動，同現場三百幾名長者一齊參加「童軍廚房」午宴。講起廿六歲嘅兒子Chandler第一次創業已經有好成績，Mingo好謙咁話係好彩。
囝囝堅持用日本蛋
Chandler做事認真，就算爸爸幫襯都無特權，有次Mingo朋友想幫襯，佢都要幫朋友排一個鐘隊先入到座。Mingo仲話Chandler創咗業佢先知，但佢都有畀意見，依家仲忙緊幫手搵舖位，希望可以喺夏天前搵到地方，免得客人喺街上排隊咁辛苦。至於食材方面，Mingo話日本主廚對拉麵嘅品質好堅持，雖然麵係香港製造，但佢開店前特登喺製麵廠住咗兩日指導一番，加上唔落防腐劑，所以要每日新鮮製造，其他食材亦盡量就地取材，但係鎮店嘅日本蛋，就堅持來自日本，所以供應有限。
至於剛喺東京感受過大地震返嚟嘅葉澍堃，劫後餘生更加珍惜太太，尋日因為要返去陪太座食午飯，所以童軍美食淺嘗即止。