中環出更：李妮直覺買馬連中三元

入場前，Lily獲老公打本六千元，佢攞起本馬簿細心刨，睇見心水馬名就落注，冇理會排位同賠率，呢種隨心所欲貼馬方式，相當奏效。喺第一、二、三場馬，Lily全部貼中晒，其中兩場更買中獨贏。初哥贏大錢，認真難以置信，連Lily都話估唔到咁Lucky，收錢一刻，心情激動。

仁濟主席捧走博愛盃

多匹Fit馬尋日競逐第七場「博愛盃」，最後由仁濟醫院董事局主席董吳玲玲及老公董中浩名下愛駒「翡翠海星」勝出。「博愛盃」畀「仁濟」主席捧走，呢一幕認真有趣，博愛醫院董事局主席黃帆風就話唔介意，事關兩人係生意合作夥伴，平時無所不談，可以頒獎畀老友，感覺特別Warm。莎莎老闆娘郭羅桂珍嘅愛駒「延續美麗」尋日亦揚威馬場，由太子女郭詩慧代拉頭馬。

「最美麗港姐」朱玲玲尋日同老公手拖手入場。原來係馬會大董、全國人大常委范徐麗泰請客，范太一直履行佢做馬會大董嘅責任，不斷喺馬會請政、商界老友食飯，好似朱玲玲呢一對，范太就話大家夾時間夾咗好耐，餐飯至食得成。

董吳玲玲（中）同兒子董必政（左）齊捧走「博愛盃」，黃帆風都戥佢哋高興。

愛駒「延續美麗」奪冠，莎莎太子女郭詩慧代媽媽拉頭馬。