中環出更：彭少衍進軍日本生產奶粉
日本核災難愈爆愈大鑊，掀起全球患癌恐慌。危險時刻，唔少人就認為走得快好世界。博愛醫院總理彭少衍就人棄我取，打算進軍日本，搵廠家合作生產奶粉，佢話趁低迷時刻傾生意，分外容易打動對方。
彭少衍生意頭腦精明，尋日出席沙田馬場舉行嘅「博愛盃十六週年慈善聚餐」，大談攻日生意經。彭生公司以生產「開奶茶」聞名，賣埋奶粉，更順理成章。佢話有信心日本政府可解決核危機，「恐核情緒」只係暫時性，進軍日本正係好時機。佢話，雪中送炭，傾合作條件都易好多。
王嘉恩忍口戒魚生
物流公司東源大地老闆王嘉恩（Albert）下月重返博愛做總理，佢都心思思尋日本商機，目標係低吸日股，首選基建及能源股。Albert呢排
實日本核事故進展，周身唔得閒，佢公司接唔少日本「柯打」，將重型機器及食品運往內地，但核輻射洩漏後，中國架起重重關卡，不輕易畀日貨入境，令物流業大受打擊，生意應聲下跌兩成，好彩Albert係樂天派，有信心核輻射危機會盡快解除。但講到食日本魚生，就咪搞嘞。Albert話，以往每星期至少有三天食日本菜，最愛日本牡丹蝦及肥美吞拿魚，核輻射殺埋身，惟有暫時忍忍口。
前港姐寇鴻萍每年聖誕都會舉家去日本二世古滑雪，今年會改地點，轉去其他國家喎。
日本魚生掀起恐慌，食肆急謀對策，馬會都見招拆招，避免供應來自日本嘅魚生及刺身。卓妮發現，尋日博愛午宴上，馬會擺出一個告示牌，列明赤貝是來自大連、三文魚來自挪威、吞拿魚來自菲律賓、八爪魚來自中國，就連Wasabi都揀中國貨，謝絕日本貨，等客人食得放心。
卓妮