菲律賓人質事件死因聆訊日前終於得出結論，陪審團裁定八名港人死於非法被殺，並一致認同係菲律賓政府疏忽所致。菲國當局亦不得不承認，本港死因庭裁決同佢哋嘅調查「結論一致」。
話時話，成車香港遊客日光日白畀槍手挾持，因為菲律賓「特蠢部隊」超廢，造成八死七傷慘劇，真係冤過竇娥。正如死因研訊主任翟紹唐話齋，死因聆訊涉及八條人命近年少見，而性質同呢次事件相似嘅更屬罕見。
可惜吖，死因聆訊有結論，唔代表可以為港殤討回公道。講真，菲律賓政府無能，事發當日全世界睇得一清二楚，香港死因庭只不過係透過研訊程序認定呢啲鐵一般嘅事實，可以話結論完全係意料之中。
講開又講，就算死者家屬根據裁決提出索償，無良夾無能嘅菲律賓政府一樣可以當香港人冇到嘅啫。由慘劇發生到案件調查，無論三世祖總統阿基諾定係下面班小官僚，邊個唔係冷血到冇朋友㗎？呢，菲律賓嘅聯合事故調查及檢討委員會第二份報告月初完成，佢哋只係靜靜雞將報告上載司法部網頁，連向港府交代一聲都慳番，簡直豈有此理！
提起菲律賓政府嘅冷漠，直頭火都嚟埋，死因庭傳召該國過百證人，結果居然冇人來港，只有幾個肯透過視像作供。最惡頂嘅係，菲律賓當局居然仲話為死因庭聆訊提供咗「一切協助與合作」，真係厚顏無恥到極。
講到兩個政府間嘅對話合作，連翟紹唐都擰晒頭，「我覺得佢哋係做唔到」。正如佢質疑，如果菲律賓當局有心協助，證人唔想嚟都要嚟，點會「自行決定」出唔出庭㗎？
菲律賓政府拒絕合作，遇難者嘅冤魂難以安息，港人無法討回公道，唔止係對死者極大不敬，更凸顯菲律賓視法治如兒戲，司法變枉法，簡直無法無天無公義。
逝者已矣，來者可追。香港人對菲律賓嘅廢柴政府已經徹底失望，如果遇難者家屬要向菲律賓索償，還死者一個公道，港府應盡最大努力提供協助，市民亦一定會撐到底。
仲有吖，死因聆訊結束，菲律賓當局可能會要求港府撤銷對該國嘅黑色旅遊警示。其實，既然菲國政府漠視港人感受，拒絕合作查明真相，香港亦可以唔合作嘅啫，點解要撤銷黑色警示噃？
計功夫茶話齋，世界上觀光名勝數之不盡，去一個視法律如無物、草菅人命嘅落後地方旅行，等於攞自己條命較飛，完全唔值得！