政情：年輕建築師柬國建校
香港以往好強調個人主義、中環價值，但呢個現象近年已改變，好多專業人士都會用自己專業知識去貢獻社會。好似香港建築師學會咁，佢哋有個「青年建築師項目基金」，每年都會撥錢畀班廿五至卅六歲嘅青年建築師去申請，等呢班年輕專才公餘時可以回饋社會，造福人群。
呢個基金去年嘅得主王建明（Robert），成功申請到十萬元到柬埔寨起學校。十萬元點起學校呀？原來係得㗎，Robert話，十萬元喺香港隨時連裝修一間屋都唔夠，但去到柬埔寨就已經好見使，足夠起一間面積一百六十平方米嘅學校，可容納四十個學生。
Robert仲透露，今次選中柬埔寨，因為該國係東南亞地區中發展得比較慢嘅國家之一，佢哋隊義工早前去過柬埔寨做實地考察，今年七月會再去當地落實起學校計劃。佢強調，兩次去柬埔寨嘅機票都係義工自掏腰包，係名副其實嘅「出錢出力」做善事喎。