政情：施子清情傾傲雪寒梅
唐代佛門高僧黃蘗禪師寫詩提到「不經一番寒傲骨，焉得梅花撲鼻香」，這正係自小勤奮學習嘅全國政協委員施子清寫照。施子清自小以梅花作為學習對象，而教佢佛學嘅師傅就幫佢改咗別號叫「雪香居士」，意思係要佢做一棵喺風雪之下仍飄出香味嘅梅花。
正因為「雪香居士」別號，施子清屋企收藏咗好多以梅花為題嘅畫作，閒時會出席展覽或到拍賣會尋覓心頭好。日前現代中國繪畫先驅林風眠徒弟秦不染舉行畫展，作為好友嘅施子清都有撐場，一見秦不染筆下以雪中梅花為題嘅《傲雪》畫作，即大為喜歡，仲即時買下，等展覽後帶返屋企珍藏，但幾多錢佢就唔肯透露嘞。
施子清坦言，近年佢已經好少去拍賣會買名畫，一來拍賣價錢愈來愈貴，二來近年拍賣品都太過完美，少咗一啲人性化，所以望而卻步。咁施生以前買落嗰幾百幅名畫，至今咪水漲船高囉？施生滿不在乎咁話，升值幾多對佢無影響，因為佢只買不賣嘛！