政情：醫管局減通報遮醜？
醫療事故鑊鑊新鮮鑊鑊甘，食物及衞生局局長周一嶽畀人笑稱「周一鑊」，就係因為佢負責嘅食物衞生同醫療範疇，幾乎每個禮拜都爆一次大鑊。佢旗下嘅醫院管理局都唔好得好多，每隔一排都爆出千奇百怪嘅醫療事故，由派錯藥、抽錯血、打錯針，以至漏咗啲手術工具喺病人體內都有。唔知係咪因為爆鑊爆得太密，醫管局尋日就喺毫無事先諮詢下，突然將向來每兩個月公布一次嘅醫療事故《風險通報》，改為每三個月先公布一次，認真縮骨。
根據原定每兩個月公布一次嘅安排，醫管局理應喺尋日公布新一期《風險通報》，全港傳媒都引頸以待，因為呢份通報每次都會列出大量之前冇曝過光嘅醫療事故，公眾一向極為關心，求其一則消息都可能成為翌日嘅報章頭版。點知最後就反高潮，醫管局突然宣布更改《風險通報》嘅發布時間，變相由每年公布六次，縮減為每年公布四次，新一期通報要等到一個月後先有得睇。
醫管局之前成日話會提高醫療事故嘅透明度，依家自打嘴巴政策大倒退，大家都即時想起係咪同新上任嘅行政總裁梁栢賢有關。除咗因為佢呢排忙於處理醫生工時問題，另一個原因係由於佢正係呢個通報機制嘅始作俑者。
話說梁栢賢早年由衞生署借調到醫管局時，擔任質素及安全總監，專責處理醫療事故同提高病人服務質素嘅工作。佢當時為咗要當局提高事故透明度，唔想次次被傳媒踢爆醫療事故，搞到經常要膽戰心驚，喺唔少反對聲音下，於○七年實施嚴重醫療事故通報機制，要求醫護人員喺出事廿四小時內，透過系統向當局通報嚴重事故，以便即時處理同做調查。
當時梁栢賢亦創先河提倡要定期公布醫療事故，每兩個月出版《風險通報》，喺唔公開涉及醫院同醫生情況下，簡述事故經過及出錯原因，希望畀醫護人員一個警惕。另一方面，醫管局當然寧願玩自我踢爆事故，好過畀傳媒率先披露啦。
稱爭取時間挖料分析
醫管局解釋今次變動，係想畀通報嘅編輯小組多啲時間，搜集事故資料同做分析，真係想搵人信都難。如果呢個決定真係由梁栢賢拍板嘅，就再次證明「屁股指揮腦袋」呢句話，喺政界同醫學界都係啱嘅，某啲人升到某個高位，就會唔記得甚至全盤推翻自己講過同做過嘅嘢，着實全港市民同病人深感悲哀！