中環出更：董吳玲玲翡翠玉石晒冷
珠寶玉石向來都係女士們嘅恩物，仁濟醫院主席董吳玲玲都唔例外，情迷翡翠玉石早已名聞社交界。早前董太就喺一間六星級酒店舉行春季珠寶展，吸引一眾翡翠迷及商界老友撐場，卓妮都去趁熱鬧，見到董太多年嘅稀世珍藏，特別係董太私人珍藏嘅清朝玉石聚寶盒，雕工完美，盡顯稀世古玉嘅貴氣，實在眼界大開。
卓妮甫入場就見到飾櫃內琳琅滿目嘅玉石珠寶，色澤完美嘅翡翠喺閃鑽配襯下，閃閃生輝，無論係耳環、頸鏈或是戒指，都散發出驕人嘅貴氣。董太話，綠色翡翠最矜貴，但已買少見少，其他如紫色、透明翡翠價格都被搶高，一條色澤均勻嘅紫色翡翠頸鏈，售價可高達二、三百萬元。
董必政受媽媽薰陶
董太囝囝董必政都在場，佢啱啱喺美國讀書歸來，平時喺內地紙品廠坐鎮，當日特登返港幫媽咪手，咁有孝心，難怪董太愈忙愈起勁。必政自細喺媽媽耳濡目染下，對翡翠都素有鑽研，佢話翡翠身價更甚鑽石，有時十倍、八倍咁飆升，但佢話做呢行生意風險好大，試過有行家以二千萬元買件原石返嚟，鑿開後可用嘅靚玉部分好少，結果蝕晒大本喎！