中環出更：華菁會助大學生神州搵好工
年輕人係社會嘅最強動力，由一群內地成長、海外求學，再回流香港發展事業嘅青年才俊，近日共同創辦香港華菁會，盼為香港及國家作出貢獻。華菁會尋日正式成立，大部分會員來頭不小，包括身兼全國政協委員嘅創會主席方方、擔任副主席嘅海洋公園保育基金主席陳晴、貴州省委書記栗戰書的女兒栗潛心等，而多位名譽主席更加響噹噹。
卓妮一睇華菁會個會員名錄，發現個個都係香港各行業嘅精英。好似主席方方，現為摩根大通證券投資銀行亞太區副主席，當年佢喺美國畢業後，就來港工作，至今已有十七年，好鍾意香港生活。為咗成立華菁會，方方話用咗半年時間，將理念相同嘅各界專才聚埋一齊。為咗幫本港大學生到內地搵工做實習，佢就搞咗個「神州搵好工」活動，為華菁會打響頭炮。
至於副主席之一嘅栗潛心，現為中信資本副總裁及黑龍江省青聯常委，佢話來港半年先至搵到工作，好明白年輕人搵工嘅徬徨感覺，所以佢都好努力搵內地朋友幫手，介紹好工畀本港大學生實習。至於另一副主席、德意志銀行香港分行中國區董事總經理秦靖，亦承諾會送獲選嘅二十名精英學生到內地知名企業實習，相信到時會有一番龍爭虎鬥。
陳晴望子拜郎朗為師
同樣擔任副主席嘅陳晴，尋日就擔任大會司儀，做咗媽咪四個月嘅佢已經逐漸瘦身，話囝囝手指長長又有節奏感，將來要向身兼名譽主席嘅鋼琴家郎朗拜師學藝，但並非望子成龍，只要囝囝做個好人就得，搵幾多錢同成功與否都唔重要喎！
卓妮