政情：棠哥復出似足機械人
行政會議成員兼工聯會會長鄭耀棠上月入院做頸椎手術，雖然手術後已同大家報平安，但棠哥從此喺各大小場合銷聲匿迹，尋日佢終於重現江湖，現身香港中國企業協會廿周年酒會。大家一見到佢就好熱情上前握手問好，包括信和置業主席黃志祥、中旅集團執行董事盧瑞安等。棠哥笑容滿面，睇嚟精神唔錯喎。
棠哥話，佢已經喺屋企休息咗成個月，今次係手術後首次出席公開活動。佢又話，現時康復情況好好，但每個星期都要返醫院做兩次物理治療。當晚佢用條黑色頸巾包實條頸，動作明顯放慢咗，又唔可以隨意轉動條頸，逢親有人喺側面或後面同佢打招呼時，佢就要成個人轉身同人眼神接觸，動作好似機械人。
棠哥曾自爆手術前已向行政會議告假一個月，事關佢手腳麻痹，連衫鈕都扣唔到，所以謝絕飯局而暴瘦廿磅。尋日見佢比以前依然清減好多，件西裝顯得衣不稱身，如果買番啲新衫，相信會好睇好多。