政情：立會考察團赴英學使錢
立法會將於明年九月改選，今年暑假可能成為各黨派及獨立議員利用公費旅遊嘅最後機會。繼海濱規劃事宜小組搞咗個美加豪華考察團之後，人力事務委員會亦計劃喺今個暑假出訪南韓，了解當地嘅標準工時政策同實施情況。其實南韓政府出名善用資訊科技，估計有關文獻肯定上晒網，班議員係咪有需要花咁多公帑去當地考察，真係見仁見智。
撞正預算案答問時段
講起善用公帑，專責監察政府有冇亂使錢嘅立法會政府帳目委員會，日前又飛咗去英國考察，同當地嘅審計部門同國會議員交流，睇吓呢個前宗主國點樣防止政府亂花公帑，審計署署長鄧國斌都有跟埋去。英國政界早前接連爆出濫用津貼醜聞，唔少國會議員都牽涉在內，之後進行咗一連串改革，希望我哋班議員會好好吸取吓人哋嘅教訓喇。
訪問團喺訪英期間，咁啱撞正英國首相嘅答問時段及財政大臣向下議院提供財政預算案，相信不論提問嘅議員同解答嘅高官，質素都比香港高好多，如果香港班議員識得從中偷吓師，咁今次行程嘅機票同酒店錢都唔算使得太冤枉。