政情：楊振寧曾跟蹤愛因斯坦
講起追星，大家會諗起邊個偶像呢？又會否喺街上守候偶像多個小時呢？原來諾貝爾物理學得獎者楊振寧教授當年都有追星，但佢個偶像來頭唔小，就係物理學偉人愛因斯坦。楊教授尋日獲邀去浸大演講，同大家分享佢嘅學習經歷，期間講起一九五四年喺美國普林斯頓大學做研究時，帶埋兒子等候愛因斯坦嘅難忘經歷。
楊教授話，當年大家都好仰慕愛因斯坦，但佢去到大學先知道愛因斯坦已經退休，但辦公室仍在，為咗一睹對方風采，特登打聽愛因斯坦嘅每日行蹤，搞清楚時間同地點之後，佢就帶埋仔仔企喺愛因斯坦嘅必經之路等候，結果皇天不負有心人，最終畀佢等到，愛因斯坦仲同佢仔仔影咗張合照添！
呢件事正好將楊教授嘅學習成功之道體現出來，楊教授話，想成功首先一定要發挖同培育個人興趣，正如當日佢喺爸爸送贈嘅物理書中，發現自己對物理有濃厚興趣，之後再鍥而不捨追尋，最終獲得成功。
籲順應興趣 勿讀死書
楊教授仲勉勵現場一個小朋友話，做科學家難唔難就係要順應自己嘅興趣所在，因為每個人長處都唔一樣，喺自己感到興趣嘅方面發揮就係可以開啟一道成功之門，而且千祈唔好死讀書，如果有新思維就要追尋到底，唔好輕言放棄。