政情：何君堯上位攪亂建制派
新界廿七個鄉事委員會新一屆執委會選舉今日全部完成，今次鄉委會改選認真波譎雲詭，唔少鄉委會領導層都變天。其中最惹人注目嘅屯門鄉委會尋日改選，結果由良田村代表、律師會副會長何君堯當選主席，而現屆主席劉皇發就缺席選舉。鄉委會變天以至何君堯上位，除咗鄉議局內部勢力重整外，亦影響成個建制派未來選舉部署，影響最甚是民建聯。
坊間一直盛傳何君堯想入主屯門鄉委會外，好多人都估佢志不在此，亦對鄉議局副主席林偉強個位虎視眈眈，甚至傳佢有心逐鹿明年立法會新界西直選，雄心萬丈。何君堯尋日當選後話：「如果話畀你聽冇，你又覺得我唔坦率，話有又言之尚早。一切嘢隨住合適步伐進行，做依家合適嘅工作，唔會話諗大咗，亦唔會話唔作預算！」講得咁白，大家應該明何主席點諗啦。
恐影響民記新星前途
倘若何君堯真係出戰新界西，影響最大肯定係同是鄉事派嘅民建聯張學明。大家都知道，學明本身係新界社團聯會會長，多年來夥拍黨主席譚耀宗參選，兩屆都大獲全勝，如果加多個鄉事派何君堯，除咗分薄張學明票源外，連帶民記重點栽培嘅新星、荃灣區議員陳恒鑌想入局就更加渺茫，話唔定影響埋建制派成個大局，睇嚟民記都係時候搵對方協調吓。
至於鄉議局內部，六月初就會改選，已失落坪洲鄉委會主席嘅林偉強好大機會冇得連任鄉議局副主席，唔知作為新界南約一分子嘅何君堯，有冇興趣做副主席呢？佢笑笑口話，自己冇咁多時間分配工作，間接否認咗呢個揣測。不過，無論點都好，今次鄉委會換屆翻天覆地已是不爭事實，而發叔被踢出屯門鄉委會，已為固有勢力敲響警號，發叔要做多屆主席，都咪話無危機。
何君堯話，時代已經唔同晒，好多嘢一定要變，所以希望將自己嘅法律知識同新思維帶入鄉委會，等大家都做得更好。佢又話，嚟緊盡快走訪屯門三十六條鄉村，聽聽大家嘅意見，盡快解決同鄉民有切身關係嘅民生問題，睇嚟佢已立志為鄉郊創造一番新氣象。