中環耳目：陳嘉容出錢出力撐和食
日本遭遇地震及核輻射災難，享用魚生壽司嘅「oi-shii desu」（好味道）聲音已不復見，但深愛日本文化嘅名模陳嘉容（Eunis）就無有怕，繼續去幫襯位於銅鑼灣、佢最愛嘅「鳥羽」名古屋日本料理。Eunis明白大家對日本食品有疑慮，所以特別推介雞翼及腐皮溫泉蛋兩款熱葷。
最愛雞翼溫泉蛋
Eunis話，雞翼係以唔同溫度油炸，再掃上三層醬汁，食落唔覺油膩，賣相似足燒物。至於腐皮溫泉蛋嘅煮法係將溫泉蛋釀入腐皮再炸，保持嫩滑嘅蛋汁，製作講究。
雖然Eunis只推介兩款熱葷，但店舖負責人Aiken話，佢哋好多海產都來自加拿大及挪威，而且密切留意食材安全，讓客人食得放心。
Aiken仲計劃喺嚟緊星期日舉行義賣籌款，將「鳥羽」全日營業額捐到日本賑災。
作為朋友嘅Eunis都義不容辭，呢幾日不停打電話叫朋友喺周日拉隊去幫襯，希望日本國民重新站起來。
