中環出更：蒙德揚請師兄欣賞合唱團
香港藝術節正舉行得如火如荼，其中備受矚目嘅「聖多馬少年合唱團」音樂會日前演出，吸引近二千名觀眾入場欣賞。音樂會係信興集團贊助，除咗集團副主席蒙德揚（David）以主人家身份出席外，仲請埋公務員敍用委員會主席吳榮奎夫婦去欣賞，兩人一見面即表現得老友鬼鬼，原來佢哋係喇沙書院嘅師兄弟，難怪大家對音樂咁有興趣。
勾起小學回憶
David話，吳榮奎係佢喇沙書院嘅師兄，加上大家都做過舊生會主席，所以關係好好，佢知師兄好欣賞呢類音樂，所以請埋師兄來欣賞。David話，合唱團演唱嘅巴赫經文歌係難度非常高嘅八聲部複聲作品，凸顯了合唱團嘅完美和聲同對比，能夠深深感動現場觀眾。
David之所以對合唱團聲樂咁有研究，皆因佢讀小學時都有加入學校合唱團，難怪今次表演巴赫經文歌都勾起佢唔少回憶，加上當晚係巴赫嘅誕辰，所以佢特登買個大蛋糕送畀合唱團，順便答謝佢哋將巴赫音樂帶來香港，場面相當溫馨。