中環出更：楊立門靚聲冧歌迷倒名媛
有ＡＯ（政務官）歌王之稱嘅民政事務局常秘楊立門，靚聲一向吸引，前晚佢為文化中心舉行嘅香港管弦樂團「社群和諧」籌款音樂會擔任壓軸嘉賓，演繹歌神張學友嘅《你的名字我的姓氏》，水準甚高，獲五位城中名媛獻花，受歡迎程度拍得住當紅歌星。方津生醫生亦與失明天使汪明欣合唱英文歌，博得全場掌聲。
今次港樂能夠搵到咁多名人幫手，要多得中華總商會會長蔡冠深太太蔡關穎琴，佢擔任籌委會主席可謂絕無難度，事關人緣甚廣，好快就已經搵齊演出嘉賓，好似楊立門，一請就到，亦毋須事前任何綵排，一上台就可以得心應手，而且唱出水準。
聽到在場嘅蔡太、候任女童軍總監彭徐美雲、遠東集團創辦人邱德根孫女邱詠筠等名媛都如癡如醉，所以大家一齊上台獻花。楊立門無將榮譽獨享，將五束花分送畀指揮同樂手，相當大方。
蔡關穎琴助天使圓夢
蔡太仲借今次演唱會，請嚟方津生醫生幫失明天使汪明欣圓夢，事關明欣一直好想同港樂合作，加埋方醫生又贊助今次演出，令件事更加完美。至於原本都應承會同老公一齊上台獻唱嘅彭太，因為有私人理由無上台，最後只同老公喺台下欣賞以示支持。
卓妮同大家講開日本災情，原來對彭太嚟講都有啲影響，事關佢嘅家族製衣生意，有接日本定單做雨衣，可能會少咗百分之二十嘅定單。彭太表示，人命平安最重要，地震之後佢聯絡到東京及橫濱嘅朋友及生意夥伴，先至可以放下心頭大石。
卓妮