公立醫院掀內科醫生逃亡潮，皆因前線醫生人手短缺，個個做到有氣冇碇抖，加上缺乏晉升制度，原本醞釀工潮，終因醫管局高層出來撲火，同工會達成協議。眼見火勢有緩和迹象，食物及衞生局局長周一鑊又叻唔切出來講嘢，擺出個雷人姿勢，教訓專業嘅醫生應以病人利益為重，唔應該為加時補水而斤斤計較！
老朽一早批周一鑊冇乜常識，稍有常識的人，都唔會喺醫生嘅不滿情緒已達臨界點，火上加油，有意抹黑醫生，好似佢哋個個冷血，冇以病人利益為重，一啲醫德都冇！咁講嘢，唔扯火有鬼。周一鑊有口話人冇口話自己，作為問責局長，冇以市民利益為重，不去拆彈解危機，反而亂噏當秘笈；如今係人手嚴重不足，門診醫生只得三分鐘去睇有十三種長期疾病嘅病人，阿哥，解支籤都唔止三分鐘喇！咁搞法，醫療事故唔層出不窮就真係有鬼咯！
周一鑊今混淆視聽，講到啲醫生唯利是圖，為加時補水而斤斤計較，查實係制度問題，係管理不善，肥上瘦下！周一鑊信口開河，叫一眾做到氣咳嘅公立醫生火遮眼，有人上載多張「惡搞」佢嘅海報，要佢道歉，要佢「下台回家睡」！未知周一鑊會否又氣吞山河咁話：為咗維護病人利益而要公開道歉，簡直係天方夜譚！
周一鑊，你若真下台，最好去學彈棉花。一堆棉花可以有各種彈法，只要你的彈法妥帖，彈出來的一定會是一條又暖又鬆、散發棉花香味的被子。沒有新思維，學一門舊技藝，去除「亂彈」陋習，知所慎言，一樂也。