政情：張學明被投訴亂掛街板
各級選舉臨近，各黨各派早已各出奇謀派人落區備戰。不過，本報收到投訴，指一名自稱為「灣區居民權益協會」主席嘅沈錦添，近日卻以民建聯當區立法會議員張學明名義，喺屯門非法懸掛橫額，短短十五分鐘步行路程嘅湖翠路竟掛上多達廿六條橫額，總之梗有一條喺左近，堪稱屯門奇景。
我哋向張學明方面反映居民嘅投訴，佢哋已即時認衰，並指示地區幹事以後要小心處理街板問題。但佢同時又反指港府現時提供嘅街板位置嚴重不足，令地區人士難以透過街板向市民交代清楚佢哋嘅工作，希望當局加多啲街板位喎。
不過最搞笑嘅係，以學明名義掛街板嘅沈錦添卻聲稱，自己同對方並無關係，冇「跟過佢」之餘，亦冇話過參與任何選舉。佢話，掛街板只想話畀街坊知自己嘅工作，「其他人都係咁㗎啦，做咗嘢梗係要話人聽！」據了解，被投訴街板已被清走晒，但唔知學明知道有人用佢名義掛街板又唔認數，會唔會激到嘔血呢？