政情：李殷泰樂做「360」導遊
昂坪纜車去年開始自設旅行社，整合大嶼山景點撈埋離島遊開源搵銀，原來纜車公司董事總經理李殷泰（YT）都靜靜雞做埋兼職導遊。YT尋日同傳媒見面時坦言，親朋戚友知道佢去咗「360」後，就蜂擁搵佢做大嶼山嚮導，搞到現時幾乎一個月要去一次大嶼山，加上平時工作需要，每星期都要搭兩至三次纜車登山，做埋「360」嘅生招牌。
其實YT做導遊都相當稱職，尋日去大澳隨口都講到當地文化歷史，一時又話邊間店舖嘅茶果靚、邊間蝦膏正，絕無欺場。YT話，「360」間旅行社現時平均每日都有百多名旅客，以海外客居多，多數先坐纜車上昂坪，然後轉乘旅遊巴去大澳玩，之後再返去遊寶蓮寺同大佛，送埋心經簡林導賞行程，每位連導遊費都係二百五十元。
搵旅客執垃圾
YT嘅大計多多，遲啲仲與旅遊發展局合作搞另類郊遊，吸引海外會展商務客包團來港開會，培養吓團隊精神之餘，再加插畀團友登上彌勒山種樹，去紅樹林執垃圾等餘興節目，咁咪即係要遊客做廉價勞工？YT都承認要試吓反應喎！YT又提到今年底會喺昂坪市集搞個為期兩個月嘅嘉年華，四月則有個號稱全球首創嘅彈床琴音樂節，節目相當豐富。