政情：放寬發水樓林鄭高達互轟

港府限制發水樓嘅新規定將於下月一日生效，但近期屋宇署收到入則嘅宗數，竟比正常急增八成，可見唔少發展商趕搭「發水尾班車」。當大眾以為新措施出台後，將毋須再受發水樓煎熬時，近日發展局卻竟又因應發展商要求，再度修訂發水樓嘅作業備考，不但提供半年寬限期，更容許佢哋延遲提交環保建築評級，並放寬地面停車場獲豁免嘅樓面面積，令新措施形同虛設。

高達尋日喺特別財委會上鎖定目標炮轟林鄭，鬧佢咁做係向發展商跪低：「我哋話林鄭局長係最打得嘅局長，但今次局長面對發展商一再跪低，仲要跪低三次，會令市民覺得政府好軟弱、官商勾結，我想問局長會唔會有第四次跪低？」林鄭一聽「跪低」二字，即時面色一沉咁駁斥：「任何人若只係『好打得』，但並唔合理，都唔值得大家推崇。」

暗寸李永達拖慢進度

林鄭又強調，港府當初制訂限制發水樓嘅政策時，早已表明過程會好複雜，當中涉及十五份作業備考，需要諮詢業界同建築師學會嘅意見，直言今次嘅修訂正係諮詢業界後嘅結果，再三否認自己「跪低」。一輪衝鋒後，林鄭更「回敬」高達，批評佢有份參與嘅一手樓銷售手法檢討小組，就規管售樓書安排進展較原先預計緩慢，令當局要作出技術性修訂，暗寸高達辦事不力，拖慢當局工作進度。

其實除咗林鄭外，近期一眾高官，包括政制及內地事務局局長林瑞麟及保安局局長李少光，出席特別財委會時都好似磨利張嘴等交嗌。林鄭今勻死撐反擊雖可保住佢「好打得」嘅形象，但佢與其嘥時間同議員駁火，倒不如花多啲精力認真聽民意，做好本分好過啦！