中環耳目：陳健波鍾情中國會鯇魚粥
保險界立法會議員陳健波向來食得清淡，除咗經常做運動外，每朝仲會飲自家製嘅無糖豆漿，出街食飯亦只會飲清水，連茶都唔飲，實在係名副其實嘅健康生活派。原來健波平日食晏最喜歡去中環銀行街嘅中國會，歎傳統中式食品，一來貪嗰度就腳，而且菜式好味又健康喎。
古法精製傳統食品
中國會眾多食品之中，陳健波最欣賞係嗰度啲粥品，因為個粥底又香又綿，比起市面一般粥品優勝。咁多種粥之中，佢對鯇魚粥情有獨鍾，覺得用料好新鮮，配埋個靚靚粥底，真係無出其右。據講個粥底要先加入煲溶晒嘅上等腐竹，然後煲兩小時，先至可以煲出美味嘅靚粥。
除咗鯇魚粥外，健波對中國會嘅腸粉及牛脷酥都讚不絕口，佢話中國會一直堅持用古法精製傳統食品，花時間之餘亦一絲不苟，好似腸粉係不折不扣嘅「布拉腸粉」，真係見到都令人流晒口水呀！