中環出更：馬清鏗報紙包畫防霉抗蟲
名人愛好收藏名畫玩意，但香港天氣潮濕，如何存放真係好考心得。教育學院校董會副主席馬清鏗就有爸爸教落嘅古法良方，只要用報紙包住字畫，保證唔怕發霉同畀蟲蛀。
教院尋日首次頒授冠名講座教授銜，城中多位善長齊出席，除著名工業家蔣震、華人置業副主席劉鳴煒外，仲有希慎興業已故前主席利定昌夫人利張錫齡。原來熱心捐助教院嘅利太係藝術發燒友，擔任香港藝術館之友執委會主席，閒來最愛收藏中國書畫。
咁啱得咁蹺，馬清鏗都係名畫收藏家，講起珍藏書畫妙方，佢就趁機過番兩招。佢話爸爸教落，先將名畫捲起，再用報紙包實，由於報紙吸濕力強，而油墨嘅化學成分亦有助辟蟲，絕對係平靚正之選，唔知利太會否倣效呢？
蔣震日睇三份報章
蔣震對教院都有深厚感情，皆因熱心辦學係佢人生最大目標，可以活到老、學到老。八十四歲嘅蔣老，每日堅持睇三份報紙，關心天下事，佢又教導子女要知書識禮，所以佢每個仔女至少有大學學位，有啲仲係碩士同博士添。
劉鳴煒都話教育好重要，佢家族會繼續捐獻教育事業，為香港培訓專才，發揚奮發上進嘅香港精神喎。