中環出更：莫華倫返夏威夷再度蜜月
世界頂級男高音莫華倫唱盡經典浪漫樂章，原來私底下亦係浪漫之人，不經意嘅驚喜，總係氹得老婆邱文伶（Winnie）如癡如醉。莫華倫月前再同Winnie到夏威夷茂宜島（Maui）度假，令Winnie勾起十六年前喺當地舉行舞台婚禮嘅難忘情景，時至今日，旁邊除咗老公之外，仲多咗個乖仔禮剛。今次莫華倫再度蜜月之餘，仲去探望檀香山定居嘅哥哥。
當年劇院舞台成婚
莫華倫自小在夏威夷檀香山讀書至長大成人，所以佢人生最重要嘅其中兩件大事，都揀喺檀香山上演。第一件就係十六年前喺檀香山結婚，Winnie話，當初莫生話要喺舞台上舉行婚禮，仲以為係講笑，點知佢哋去到夏威夷，細心嘅莫生已經安排好一切，搵咗佢個導演老友幫手，喺劇院舞台舉行婚禮。
當時正值「波希米亞人」踏台板綵排，成個戲棚為咗莫華倫嘅婚禮休息一日，但並冇因為咁多咗日假期，工作人員只係幫佢哋舉辦婚禮，Winnie仲棄穿婚紗，入鄉隨俗戴上花環，並穿上當地傳統Muumuu長裙，做個夏威夷媳婦。老公送上咁驚喜嘅婚禮，搞到Winnie由進場喊到禮成，咁難忘嘅婚禮，相信只有屬於舞台嘅莫華倫先做到。
至於第二件事又係乜呢？咪就係做爸爸囉！莫華倫成日要到外地演出，好少時間陪伴嬌妻，但係生仔咁大件事，Winnie當然希望老公陪伴在身邊啦，咁啱當時莫華倫喺夏威夷演出，所以Winnie二話不說就飛過去會合老公，結果佢哋嘅愛情結晶亦順利成為夏威夷BB。
Winnie話老公對呢個地方好有情意結，一來充滿咗佢讀書同成長嘅美好回憶，加上陽光與海灘，所以將來人生最美好嘅退休生活，都預約咗老婆喺夏威夷度過餘生，卓妮聽到都感覺相當浪漫。