尖東站出口 台階跣人
市民由尖東麼地道地面踏足港鐵尖東站P2出入口前，需經過一個露天台階，但是商戶阿強（化名）卻目擊不少途人因台階表面過滑而跣倒，「我試過見到有大肚婆跌親，真係好危險！」阿強曾向港鐵職員反映，卻獲覆指有關位置非其管轄範圍而未獲處理，「咁係邊個管？有意外邊個賠？」
路政署發言人證實，有關位置由當局保養及定期巡視，以往未曾接獲有市民滑倒，接獲轉介後，已安排承建商在上址梯級進行防滑檢測，以評估需否在梯級表面加上防滑塗層。
「街坊話幫手叫救護車都叫咗三次！佢哋竟然話冇收過投訴？太離譜喇！」當區區議員關秀玲指出，有關台階較一般石屎路面平滑，且「冇遮冇擋」，一旦下雨即易生意外，直言當局忽視潛藏危機，促盡快落實加鋪防滑塗層，避免意外，「唔通真係要再發生意外先安樂？」