平等機會呢家嘢，理論上梗係好啦，否則當年嘅共產主義唔會吸引到咁多仁人志士投身革命，共產世界咪就係非常之咁美麗嘅平等世界囉。可惜經過一百年嘅實驗證明，共產主義係行唔通嘅，平等機會唔係話鬥鬥地主就可以唾手可得。
當然啦，平等機會呢家嘢仍然係非常之咁美麗嘅，所以香港有一個平等機會委員會，理論上係為民請命消滅不公平待遇。問題係，平機會通常眼高手低，絕對係撞板多過食飯嗰隻。其實咁又難怪嘅，連中國共產黨都冇辦法爭取人人平等，平機會何德何能創造美麗新世界？
不如睇睇平機會點樣撞板先吖。平機會去年向政府申領近八千萬元資助，淨係處理八百幾宗投訴，成功調解嘅只有六成，多年來不能調解嘅個案累計接近一千五百宗。根據平機會向立法會議員劉慧卿嘅書面質詢回覆顯示，○九及一○年平機會耗用九十四萬多元公帑，將十六宗個案提交法院審理，除咗四宗仍未審完，僅得一宗被裁定勝訴。
呢嗱，勝訴比率低得咁交關，你話平機會係咪撞板多過食飯吖？由此又反映另一個問題，好多時候平機會根本就係濫告無辜，唔講道理吖嘛，所以咪敗訴囉。其他唔講嘞，功夫茶淨係為大家介紹兩宗最有切膚之痛嘅個案。第一宗係平機會發信要求《太陽報》調解，理由係涉及殘疾中傷，點知原來係平機會擺烏龍，涉事嘅係另一報章。第二宗係曾經有人誣告東方報業集團違反殘疾歧視條例，平機會唔理三七二十一提出訴訟，由於理據薄弱到極，所以法庭判平機會敗訴。不過可惜吖，東方雖然打贏官司，仍然要付出一百四十萬元律師費。至於打輸官司嘅平機會，亦都浪費咗五十一萬元公帑。
好心平機會做下功課，睇下投訴人有冇事實根據先至訴諸法庭。濫告無辜係損人不利己嘅缺德行為，一來浪費公帑，二來打攪法庭，三來滋擾平民，四來自毀招牌，你話係咪無聊到極？
城市大學專業進修學院學術統籌宋立功就講得啱嘞，十二宗已審完嘅個案只得一宗勝訴，無疑係浪費納稅人嘅錢，不如將啲錢去幫助弱勢社群同長期病患者，仲有效益。以一單官司開支五十一萬元計算，等同綜援四人家庭三年幾標準津貼，足夠令四千幾個基層市民得到一星期食物援助，亦都可以資助五千六百幾個長者補牙。
不妨咁諗，平機會一係執笠，一係重建改做「平等扶貧委員會」。與其擾民嘥公帑，不如清拆平機會用公帑扶貧好過啦！