財政司司長曾俊華鬍鬚曾發表「史上最廢」預算案，暴露晒佢其實毫無管理本港財金嘅能力同理念，兼且又無心肝，不過佢又要扮反思。佢確實有冇真心檢討？睇吓佢講乜就知嘞。
佢尋日喺網誌話，喺地震之後，政府不敢怠慢，佢亦檢討咗成個金融市場嘅情況，結論係運作正常。佢又提到近日有啲不良分子，利用天災編造謠言以製造市場同社會恐慌，發生搶鹽事件，說明恐慌氣氛籠罩下，非理性嘅情緒容易蔓延。佢應該明白，非理性情緒容易蔓延，理性嘅真理，更係戰勝一切，佢喺發表「史上最廢」預算案後遭市民理性嘅抨擊，後來搞到要亂派錢息民憤，咁顯淺嘅道理，唔知佢明唔明呢？
地震後，佢檢視過本港金融體系無問題，就好似安樂晒咁，佢知唔知因為今次地震，令食材短缺，必定再推高通脹？
尋日有工會已經走出嚟發出警告，話相關食肆會受到影響，可能造成數千人失業，鬍鬚曾喺網誌卻隻字不提呢啲問題，證明佢後知後覺，再檢討幾多次，都冇用架喇。