政情：又有前高官加入新民黨
新民黨喺立法會議員葉劉淑儀領導下，短短幾個月已經打響名堂，仲先後吸引到多個知名人士出任顧問團成員，都咪話唔犀利。繼早排公布嘅著名電視烹飪節目主持甄文達之後，新民黨尋日又宣布成功邀請到幾位重量級人馬加入顧問團，而且又多一個前高官加盟添。驟眼睇，葉太個「管治班子」已經成形，唔知佢有咩盤算呢？
共有「六星」加盟
最新成為新民黨顧問嘅有六位咁多，包括前政府資訊科技總監葛輝、嶺大社會老年學講座教授陳章明、中大工學院副院長黃錦輝、新界總商會主席王振聲同前數碼港行政總裁楊偉雄等。新民黨顧問團成員可以話係粒粒皆星，有前高官、商界領袖、教育界代表、學者甚至醫生都有，覆蓋認真全面。
葉太曾經做過問責高官，對政府運作瞭如指掌，雖然佢依家已經冇做高官，不過同公務員團隊嘅關係仍然相當唔錯。佢依家自組政黨，搵到咁多前高官撐場，加埋其他範疇嘅專家同翹楚，難怪有人對佢充滿期望，希望佢更上層樓取代呢個垃圾政府啦。