政情：民記為選票猛抽政府水

民記幾乎係最早建議港府申亞嘅政黨，但最後港府決定去馬之時，佢哋又不敵巨大民意，看在選票份上，一嘢蹺起港府，最終反對申亞，令港府極為面懵，曾蔭權亦曾因此事而喺特首答問大會不點名批評民記呢位「好朋友」。

譚Sir尋日出席電台節目時，就對民記現時同港府嘅關係支吾以對，起初只係話大家都係抱住共同目標一齊做事，其後被主持人不斷逼供，問同政府似係朋友多啲，定係兄弟多啲，譚Sir先話：「做兄弟又好似親得滯，朋友又疏得滯喎。」仲強調民記唔會透過批評港府去抬高自己。

不過朋友又好，兄弟又好，譚Sir喺節目上不斷批評港府處事反應慢，政策醞釀期太耐，致令唔少政策出台後都同民意有落差，而申亞同埋注資六千蚊到強積金戶口就係因為咁而宣告失敗；佢又斥港府同議會溝通不足，搞到現時行政立法關係不佳，仲建議下屆政府大可委任多幾位立法會議員入行政會議，等港府可以更有效吸納民意，爭在未開聲叫港府繼續委任民記成員入局。

恐趕捧場客 盡失民心

查實民記講到尾都係為選票，一到選舉年，同港府幾好兄弟都冇情講。譚Sir亦喺節目上直言，政黨為選票、為樹立好自己嘅形象，抽水屬自然現象，只要大家喺成個過程中以大局為重，唔好做得太亂龍就可以。喺選舉年，政黨見選票開眼，確係「自然」，不過佢哋唔好忘記，市民嘅眼睛係雪亮嘅，如果政黨例如民記為抽水而抽水，尾大不掉辜負市民對佢哋嘅期望，失晒民心之後，捧場客走晒，到時唔理你係政府嘅敵人定係朋友，就點都無法挽回嘞。睇嚟民記都要好自為之囉！