中環出更：潮州節巡遊名人齊撐場

潮人搞喜事，長實主席李嘉誠表弟莊學山及全國僑聯副主席陳有慶等潮州富商齊撐場，玩具大王蔡志明公子蔡加讚都以「家己冷」身份擔任籌委會主席，佢晨早到場打點，但就唔見女友汪圓圓。

大會安排逾千人浩浩蕩蕩大巡遊，沿途表演潮州傳統舞蹈，包括普寧英歌舞、饒平有馬舞及潮州大鑼鼓，聲勢浩大。Eric話，今次表演別開生面，部分舞蹈連佢都未睇過，最開心係睇見年長嘅潮人睇得好投入，勾起老人家們的兒時回憶。

巡遊隊伍所到之處，均有逾萬名市民夾道歡迎。呢排春雨綿綿，Eric曾擔心巡遊當日會遇上風雨，幸好天公作美喎。潮州節只係啱啱開始，嚟緊呢兩日仲會喺九龍城廣場舉行潮州美食節，展出多款民間美食。問Eric最愛哪些家鄉食品，佢不假思索話:「係墨魚子粿。」呢款食品係以大量墨魚子製成如蘿蔔糕般，每次返家鄉潮州達濠先食到，非常珍貴。

九龍西立法會議員李慧琼（左起）及梁美芬為舞獅點睛。

鄭錦鐘（右二）同蔡加讚（左一）出錢出力搞潮州節，莊學山（左二）、陳有慶（左三）及潮屬社團總會主席許學之（右一）齊撐場。