中環出更：李運強好心有好報
日本核輻射危機稍降溫，但地震重災區的仙台縣仍儼如廢墟。「造紙大王」李運強喺仙台投資嘅紙廠，亦淹沒喺海嘯中，幸好喺日本嘅生意夥伴逃過大難。李生慷慨捐出三百萬港元，助對方重建新廠房，認真唔話得。
仙台廠夷平地 仍助拍檔
處變不驚嘅李運強，尋日現身沙田馬場消遣，佢坦言自己喺地震中損失輕微，慶幸全部員工安全。李生話，仙台間紙廠係早前入股，佔三成五股份，雙方合作生產卡紙，佢本來計劃六月去仙台同拍檔傾生意，估唔到一場海嘯，將間廠夷為平地，令拍檔血本無歸。
咁淒涼，李運強自掏腰包，助對方渡過難關。好心果然有好報，公子李文俊愛駒「包裝選擇」尋日揚威第九場，頭馬獎金高達四十八萬幾元，李運強同太太興奮拉頭馬，仲雀躍地話要將獎金捐出嚟做善事。
仁濟醫院董事局主席董吳玲玲尋日入場為老友匹「俊威威」打氣，結果「俊威威」喺第五場奪冠，佢興奮上前拉頭馬，可惜賽前佢嫌匹馬檔位唔多靚，冇落注，最終白白走寶添。對於陸續有日本食物驗出受核輻射污染潮，董太話會
到實，不過暫時會少食日本菜，睇定啲再算。
近日較少亮相馬場嘅政壇富婆張永珍尋日現身，為愛駒「頭等艙」首次出戰做啦啦隊。可惜「頭等艙」入閘後忽然怯場，左Fing右Fing，騎師杜利萊被摔落地下，搞到扭親腳，「頭等艙」惟有退出賽事。出師未捷，張永珍唔單止冇失望，仲氣定神閒話無所謂：「賽馬係興趣嚟啫，希望佢（頭等艙）下次會好啲。」至於張永珍早前遊南京欣賞梅花盛開，遲啲會遊杭州，總之就優哉游哉，歎吓世界。
卓妮