265B脫班 乘客苦等40分鐘
行走天恒至旺角的九巴265B被指經常脫班，令上班族大失預算！倪先生指該線班次原為每十五分鐘一班，但近期多次失準，「有次等咗成四十分鐘先有巴士埋站，搞到全部人都起哄，真係要改善吓！」
九巴發言人解釋，由於當日旺角交通擠塞，加上其中一部265B中途故障，有關班次有所延遲，公司將繼續留意服務情況，有需要時會調動班次。
元朗區議員周永勤亦直指265B班次脫班情況嚴重，且得悉九巴已被多次警告，但是並無改善，「九巴恃住得佢一間營運根本未驚過！」周指天水圍北有居民近十八萬人，九巴應加快改善服務，以免影響居民出入。