廣田邨聚賭 警打擊不力

阿偉居於藍田廣田邨，單位面向屋邨平台，每次外望均發現有大批居民正在聚賭，「每日都有幾十人喺度賭錢，又有人隨處大小二便，搞到周圍污糟邋遢！」

「到此一遊」式巡查

阿偉指出上址「賭檔」甚具規模，除每日定時有人聚集賭錢外，期間更有「天文台」負責通風報信，每次警方「冚檔」前，聚賭者均以迅雷不及掩耳的速度「散水」，他指：「啲警察嚟到都走晒人啦！」阿偉不滿警方以「到此一遊」式巡查，無助打擊非法聚賭。

警方發言人承認，今年一月二十四日晚上約十二時，曾接獲舉報指上址有人非法聚賭，隨即派員前往調查，但未有發現。去年二月至今年一月期間，觀塘區特別職務隊在上址先後進行十一次打擊非法聚賭行動，共檢控四十三男五女，每人罰款三百元至七百元不等。發言人又稱，警方與房屋署已採取策略，包括安裝閉路電視作為預防措施，亦要求管理處在賭博黑點加強巡邏。

「一年先巡得嗰十一次，平均一個月一次都冇，拉到嘅亦都淨係幾十人，呢啲數字根本反映唔到現實！」當區區議員柯創盛狠批警方打擊聚賭行動「中看不中用」，不但巡查次數少，效果亦有欠理想。柯指上址聚賭情況極影響居民生活及環境衞生，過去亦曾向警方反映，惟警方只採取例行式巡查，打擊作用有限，「成日都係等人報警先派人嚟，始終都冇辦法杜絕！」

散水 聚賭人士獲悉警方即將掩至「冚檔」，迅即「散水」。

食白果 駕着電單車的警察掩至，但已「人去樓空」。

促放蛇檢控違例者

立法會保安事務委員會委員潘佩璆亦擔心，警方一旦輕視聚賭的嚴重性，將引發更多民生問題，包括令治安惡化。「差唔多每條（屋）邨都有聚賭問題，警方可能覺得係小事，所以唔重視，但愈唔理就會搞到愈嚟愈嚴重，到時就好難搞！」潘建議警方除增加巡查次數外，亦應以「放蛇」方式檢控違例人士，「拉得多自然唔敢咁猖狂！」

記者 梁少儀