近年不良資訊氾濫成災，社會烏煙瘴氣，導致青少年風化案無日無之，令人觸目驚心。歸根究柢，淫審制度千瘡百孔，淫審處助紂為虐，先至係罪魁禍首。勢估唔到，面對市民要求改革淫審制度嘅強烈呼聲，當局居然玩拖字訣，敷衍民意，虛應故事，簡直可怒也！
話說港府○八年底展開對《淫褻及不雅物品管制條例》嘅全面檢討，第一階段諮詢早就結束，原定兩年前進行第二階段諮詢，內容包括「淫褻」及「不雅」嘅定義、審裁處嘅運作同互聯網及新媒體嘅處理等。點知拖到依家仲係無影無蹤，所謂諮詢變咗杳無音訊。立法會議員劉慧卿忍唔住向商務及經濟發展局提出質詢，你估該局點樣回應吖喇？佢哋話喎，仲要就檢討條例嘅下一步工作進行詳細研究，連幾時進行諮詢都講唔出。
有冇離譜啲呀！家陣講緊檢討現行條例，唔係制訂新法例噃，前後都檢討咗三年喇，依家仲話要繼續研究，咁究竟仲要研究到幾時呢？其實，當局嘅所謂研究根本就係呃鬼食豆腐，正如議員話齋，諮詢最終都係不了了之嘅喇，問題只會一拖再拖。亦有議員質疑當局根本冇膽改革，無了期咁拖延，只不過係想將呢個燙手山芋留畀下屆政府。
話時話，立法會議員今次拍案而起，可以講係擊中要害，但咁係唔夠嘅，作為民意代表，應該繼續窮追猛打，為市民主持公道。大家都知道，淫審處不嬲都係親疏有別，執法不公，一方面打壓正義傳媒，另一方面包庇淫賤傳媒，先至搞到香港烏煙瘴氣，亂七八糟，所以咯喎，要檢討淫褻條例，首先就要整頓淫審處。
提起淫審處，唔止笑話多，醜聞更加多。世界藝術珍品「大衞像」當不雅，希臘《愛情神話》當色情，簡直笑死人。而最離譜嘅係，《東方日報》及《太陽報》刊登外國女星Kelly Brook照片，被評為二級不雅，爛果報刊登同一輯照片就變成一級非不雅，而香港有售嘅外國雜誌《NOW》無遮無掩刊登相同照片，甚至連送檢都慳番添。淫審處唔止雙重標準，直頭係三重標準，「告一間唔告一間」，如果話佢哋唔係玩針對，你信唔信吖？好明顯，淫審處已經淪為港府打壓異己嘅政治工具，唔怪得諮詢一拖再拖喇，講到尾，當局根本唔係真正要檢討。
講開又講，淫審處過去幾年處理個案數目好似過山車咁，時多時少，多嘅四萬幾宗，少嘅得一萬幾宗，但奇怪嘅係年年開支都差唔多，一年處理一萬幾宗同一年處理四萬幾宗，都係要使咁多錢，究竟呢啲錢使咗去邊，睇嚟審計署有必要查一查。
總而言之，港府檢討淫審制度做騷咁做，無非藉諮詢拖延時間，拖吓拖吓就夠鐘拜拜，關人個關。其實，民意早已清清楚楚，再諮詢都一樣，計功夫茶話齋，與其再嘥時間諮詢，不如索性摺埋淫審處好過！