政情：潘佩璆扮核專家尷爆
日本核電廠輻射洩漏事故引起中港澳三地「盲搶鹽」外，亦發現部分立法會議員對核電廠知識一知半解。立法會保安事務委員會尋日召開特別會議，綽號「IQ博士」嘅中總代表黃宜弘就請教到場嘅核專家，話科技日新月異，點解唔可以喺核電廠設立遙控監察系統，當遇上大型天災就即時用遙控關閉核設施，避免核電廠成為城市炸彈。
工聯會潘佩璆更加有「深度」，關注福島核電廠使用嘅燃料「鈈元素」，又話知道鈈元素可以用來做核武，用喺發電就好唔尋常，問核專家知唔知日本政府背後有乜含意喎！
列席會議嘅大亞灣核電廠核安全委員會副主席李焯芬，聽到議員嘅問題，真係唔知好嬲定好笑，佢解釋話日本核電廠喺地震後經已自動關閉；而鈈元素用來做核武嘅濃度，比起發電嘅濃度要高好多，間接話畀潘醫生聽佢諗多咗嘞！