政情：梁廣灝呻公職唔易做
日本核災難令全球陷入恐慌，工程師出身嘅能源諮詢委員會主席梁廣灝（Edmund）突然人氣急升，曝光率勁增，事關港府要搵佢
實核事故嘅最新發展，傳媒亦爭相搵佢解畫，令佢忙到氹氹轉。不過，Edmund言談間卻流露呢份專家工作唔易做，因為佢幫手做公職之餘，仲要返工顧住自己嘅飯碗。
前晚Edmund現身航空業慶祝一百周年晚宴，見佢行色匆匆，急到好似熱鍋上嘅螞蟻，原來佢驚遲到失禮人。其實Edmund為咗向市民交代日本核危機嘅最新情況，焗住要時刻實各方數據，忙到飛起。當問佢係咪日日坐定定準備隨時同港府溝通時，佢就好大反應話：「梗係唔係啦！我要返工㗎！」
Edmund嘅公職形象深入民心，曾任香港工程師學會會長，十五年前已躋身能源諮詢委員會成員，四年前獲委任主席至今。
由於Edmund熟悉能源、工程及交通問題，經常喺重大事故發生後現身，所以幾乎令人忘記咗佢係上市公司新昌營造董事總經理，難怪佢話自己仲要返工喇。