政情：審計報告擬出手機版
iPhone掀起咗智能手機革命，依家乜嘢服務都有手機版。負責為各個政府部門衡工量值嘅審計署，原來都諗住順應潮流，推出手機版審計報告，等市民可以透過手機睇吓啲部門點樣大花筒亂Fing公帑。不過唔知市民興趣大唔大，萬一泛人問津，審計署自己嘥咗公帑又點計呢？
立法會資訊科技界議員譚偉豪，幾乎對每一個政策局同部門，都會問吓佢哋準備使幾多錢去搞IT同埋將會有乜新IT服務，不過好多政府部門都只係敷衍了事，淨係話會花錢更新吓啲過晒時嘅電腦系統同軟件，偶爾有啲話會更新吓個網頁，已經講到好新潮好進步咁。
反而外表打扮一啲唔潮嘅審計署署長鄧國斌，今次就最貼近潮流，話該署正在研究推出審計報告手機版嘅可行性，如果技術上可行，佢哋就會喺嚟緊一個財政年度搵承辦商推出，估計開支約十萬元。
審計署一年出兩份審計報告，每份最少都有七、八本，每本閒閒地都幾十頁紙，而且大部分係文字，缺少相片圖像，要將報告變成可以方便及吸引市民閱覽嘅手機版，其實一啲都唔容易。不過審計署願意與時並進，點都好過墨守成規嘅。