政情：譚耀宗帶隊武昌「搞革命」

參觀三地孫中山事迹

其實講清楚啲，應該係睇革命至啱，譚Sir尋日透露會喺復活節假期親自帶隊，同三百多個中學生及大學生參加「辛亥革命之旅」，分別參觀本港、中山及武昌三地沿路嘅孫中山先生事迹，包括發生辛亥革命第一槍嘅武昌。

唔知譚Sir係咪日理萬機忙得滯，將「武昌」講成「南昌」，但佢都醒覺講錯嘢，即時糾正，否則馮京作馬涼。今次革命之旅喺四月廿四日出發，一連四日，只係用咗兩日公眾假期，莫非譚Sir要留番頭兩日假期陪兩個仔？點知佢話唔係喎！不過，呢兩年都係選舉年，身為黨主席嘅譚Sir怕且有排忙，單是建制派內部嘅選區協調都有排先至傾掂數，相信佢兩位公子都會明白嘅。