政情:唐唐落足鞋油勁擦80後

經常講錯嘢嘅政務司司長唐英年,早前又再失言,無喇喇炮轟香港班八十後年輕人「剛愎自用」、「閂埋門做皇帝」、好容易會「車毀人亡」,令佢嘅民望應聲插水式急瀉,一度跌破五十分嘅合格水平,搞到自己「車毀人亡」。尋日佢出席活動再次致辭大談年輕人,不過內容同語調就一百八十度唔同晒,冇再鬧八十後不特止,仲讚到香港嘅年輕人天上有地下無,擺明係想借啲意認衰,補番架撞到甩晒轆嘅爛車。真係早知今日,又何必當初呢?

稱政府需滿足新一代

唐唐尋日獲邀出席一個國際扶輪地區年會發表演說,一開波就落足鞋油大擦年輕人鞋,話年輕人對社會好重要,好欣賞主辦單位咁重視教導同協助年輕一輩。之後佢突然話鋒一轉,聲稱政府亦有責任聆聽年輕人嘅訴求,滿足新一代嘅需要,畀青年有機會學習知識同技能,相信咁可以令到整個世界更加美好,同佢之前質疑香港八十後只顧自己權利、不顧社會義務嘅講法啱啱相反。

唐唐又話,政府對年輕人有好強烈嘅使命感,會透過教育去兌現呢份承諾,亦會喺個人成長方面,不斷為香港嘅年輕人提供機會,支持佢哋闖出自己一片天空;政府亦會不斷向年輕人灌輸正確觀念,等佢哋加深認識中國傳統文化,又會鼓勵後生仔參與義務工作,藉此擴闊佢哋目光。

係唔係聽到毛骨悚然呢?未算呀,唐唐仲強調,政府重視年輕人嘅意見,又認同一班後生仔全情投入社會事務嘅行動,因為由環保到居住問題、由醫療改革到社會公義等議題,都見到年輕人嘅蹤影;對於香港年輕人嘅願景,同埋對弱勢社群嘅憐憫之心,佢深有啟發喎。同佢之前大鬧班八十後偏激冒進比較,明顯係打倒昨日之我!

其實出席今次年會嘅嘉賓,大部分都已年到中年甚至老年,八十後九十後參加者絕對唔多,年會主題亦並非單講年輕人,唐唐今次致辭用咁多篇幅講年輕人議題,相信係一早挖空心思、故意騎劫人哋個活動幫自己補鑊,真係虧佢諗得出。點解唔正正經經開番個記者會,公開向全港八十後道歉認錯同收回之前言論呢?班特區高官連認衰都認得衰過人。

Money18新功能「18好路數」為你預測心水股票升跌機會率