中環出更：鄭重科：咪帶阿媽去見工
機會永遠係留畀有準備嘅人，搵工都係咁話。香港青年聯會尋日喺柴灣青年廣場舉行嘅招工日，一眾青聯骨幹及政商名人去撐場，各人分享見工經歷，趣聞一籮筐，而見工錦囊主要係要做足準備功課，有自信及態度積極，切忌走精面，仲有千祈唔好帶埋阿媽去見工。
彭芷君主動有運行
本身係咭片皇董事總經理嘅青聯副主席鄭重科（Tony），佢都有份提供職位，尋日梗係要現身撐場啦。Tony話見過無數求職者，印象最深刻係竟然有求職者帶埋阿媽去見工，阿媽提問嘅時間仲多過個仔。結果係點？求職者咁冇自信，Tony當然唔會取錄啦！
青聯司庫彭芷君（Gigi）就話當年由加拿大畢業返港搵工，睇報紙見有間上市大公司請人，於是寄求職信，可惜石沉大海。Gigi按捺不住，主動打電話去搵有關公司嘅部門主管，向對方表明好有興趣加入，最終畀佢博得面試機會兼且獲得取錄。
菱電集團主席胡曉明提醒求職者要事前了解應徵嘅公司背景先好去見工。青聯主席陳仲尼就寄語求職者要珍惜每次見工機會。
卓妮