中環出更：食力簡現身馬場一派輕鬆
五屆香港冠軍練馬師「食力簡」簡炳墀，果然係名不虛傳，大前日（十七日）清晨因涉嫌賄選被廉政公署拘捕，前晚深夜保釋離開廉署後休息咗一晚，尋日朝早依然精神奕奕去參加沙田馬場舉行嘅「2011香港國際馬匹拍賣會」，就算遇到卓妮，照樣侃侃而談，笑笑口話食得落、瞓得着。
國際馬匹拍賣會喺早上十點半開始，簡Sir戴住頂紳士帽同太陽眼鏡準時抵達，看來精神不俗，見卓妮即時笑笑口打招呼。不過，拍賣會開始約二十分鐘後，簡Sir就拎埋把遮準備離開。問佢點解咁早就走，佢話已經睇過晒啲馬匹，亦吩咐咗徒弟應該點做，所以唔使睇足全場喎！
「我乜嘢都見過晒啦」
對於被廉署請飲咖啡一事，簡Sir一派輕鬆話：「我乜嘢都見過晒啦！」咁覺唔覺得被人出賣咗呢？佢話︰「多多少少啦，我好平常，好平靜。」係咪食得落瞓得着？佢再次話：「我好平常。」講完之後就同卓妮講再見離開，全程處變不驚，一啲都無閃縮。
前晚簡Sir離開廉署，佢個大律師兒子簡永輝陪伴在側。簡永輝係自由黨北區委任區議員，咁啱卓妮尋日喺一個場合遇到自由黨副主席周梁淑怡（莎姐），佢話簡永輝已好少參與黨務，幾個月都未見過佢，佢亦無要求自由黨幫手，莎姐強調事件唔會影響到自由黨。
講番馬匹拍賣會，到場湊熱鬧嘅有港交所主席夏佳理（Ron）、健康快車創會主席方黃吉雯及候任女童軍總監彭徐美雲一家，最後個個都空手而回。阿Ron幽默話：「就算睇中都無錢買！」養馬十幾年嘅彭太就話馬匹好有靈性，識得同人溝通，所以佢哋一家人得閒就會去探愛駒當做親子活動，增進感情。
卓妮