日本核事故舉世震驚，福島核電廠高層被質疑一度隱瞞災情，受到千夫所指。睇嚟，一出事就設法交波卸責，可能已經成為全世界公共事業機構嘅醜陋文化，香港亦唔例外嘅咋。呢，過往曾多次被揭瞞報事故嘅港鐵管理層，卸膊作風更加不堪入目嘞，福島核電廠都話首次出事吖，港鐵事故頻仍，相同問題錯完再錯，但管理層從未有人問責鞠躬，臉皮應該仲厚過日本嗰個懷疑已經損毀嘅核反應堆保護殼。
立法會尋日討論港鐵近期發生嘅多宗事故，議員炮轟港鐵高層五宗罪，包括管理不善、應變混亂、錯完又錯等。以路軌裂縫事故為例，一個月就連爆三單，出事頻率之高簡直可以列入健力士世界紀錄大全。其實，呢啲問題市民早已司空見慣，議員最到肉嘅批評，係勁插成個港鐵管理團隊卸膊成風，從來冇人受罰，要求當局引入罰則，例如扣薪。
議員就講得啱嘞，港鐵服務每況愈下，事故頻仍，市民固然勞氣，但港鐵管理層從來唔使為事故問責，更加令人火滾。管理哲學嘅不二法門係：無壓力就無動力。港鐵管理層次次成功甩身，有錯毋須認，有鑊唔使孭，久而久之，有恃無恐，服務又點會改善呢？
港鐵上年底推出一輯電視廣告，口號係：「唔好意思！」咁啱當時發生兩鐵合併後最嚴重事故，油麻地站一條架空電纜突然斷裂，導致全線列車服務停頓四小時，全城鬧爆，從此，「唔好意思」變成港鐵事故頻仍嘅恥辱標誌，諗落都好笑。大家不妨再天馬行空諗吓，如果港鐵每次出事就播「唔好意思」嘅廣告，咁呢筆廣告費豈不是好襟計？都係咪嘞，羊毛出自羊身上，廣告費襟計，到頭來咪又係轉嫁畀乘客。
係喎，唔講幾乎唔記得，港府係港鐵大股東添。梗係啦，港鐵事故爆完一單又一單，而港府高官一於做隱形人，置身事外，避得就避。擺喺眼前嘅事實係，港鐵高層失職，港府高層懶理，搞到港鐵好似無人駕駛嘅失控列車，橫衝直撞無王管，爆軌甩轆無人理，再咁落去，遲早車毀人亡都有之！
總而言之，港鐵管理「出軌」，港府責無旁貸。首先，港府係港鐵最大股東，運輸及房屋局局長鄭汝樺同財經事務及庫務局局長陳家強坐喺董事局內，佢哋究竟點樣監管呢？唔通開會淨係識瞓覺？再講，港鐵係全港最大嘅公共運輸機構，角色唔單止為股東賺錢咁簡單，亦牽涉民生同經濟，而營運安全更加關乎人命添，點可以求求其其，是是但但㗎。
大吉利是講句，萬一港鐵爆大鑊，雖然唔可以同日本核災難相提並論，但香港人同樣承受唔起嘅咋。所以無論點都好，港府都唔能夠袖手旁觀，關人個關，正如議員話齋，必須執番正啲紀律，為港鐵引入罰則，做到有責必問，有責必究！