政情：KK開班教街坊防核
日本核輻射外洩引發香港掀起搶購食鹽恐慌，聲稱食鹽抗輻射，認真荒謬，可惜港府後知後覺，被各界狠批後才施施然派高官出嚟澄清，市民惟有自求多福。民協立法會議員馮檢基（ＫＫ）都睇唔過眼，擔心公公婆婆受謠傳誤導，計劃召開居民大會，教市民防核嘅基本知識，等大家個心定啲，並澄清食鹽唔可以抗輻射，無謂再浪費金錢買鹽。
建築、測量及都市規劃界議員劉秀成就認為，日本核危機事件係一個大教訓，暴露核能發電潛在巨大風險，港府唔應該太依重核電，不如諗吓風力或太陽能發電，仲環保安全喎。大地震餘波未了，會否波及香港？劉秀成話，香港唔喺地震帶，照計冇咁易中招，可惜鄰近深圳地震帶範圍，會否受牽連實在好難預料，佢擔心香港建築物普遍冇抗震設計，建議將來起樓時，應該考慮埋呢點。