政情：陳永棋寸CY民望落後
特首爭奪戰嘅戰幔早已揭開。疑似候選人之一嘅全國政協常委兼行政會議召集人梁振英（CY）尋日出席友好協進會舉辦嘅十二．五規劃研討會時，遇到台下fans賣口乖話佢係呼聲最高嘅特首候選人，點知另一全國政協常委陳永棋卻看在眼裏，即時搶白反駁，話全國人大常委范徐麗泰嘅民望先至係最高，搞到在場嘅CY木口木臉，場面相當尷尬。
尋日研討會答問環節期間，台下有位天津市政協提問，佢點名形容CY係「呼聲最高嘅未來特首候選人」，即時換來哄堂大笑，但范太似乎無乜反應。
「好似范太最高喎」
不過，棋哥就忍唔住話：「好似係范太民望最高喎。」提問完畢後，棋哥再幽多一默話：「先由全國政協劉兆佳回應，然後才到兩位疑似特首候選人。」
棋哥早前開到聲話政務司司長唐英年係佢「心中（特首）大熱」，尋日又幫口澄清話范太民望最高，究竟邊個先至係棋哥心目中嘅特首真命天子呢？