中環出更：蒙德揚憂影音器材缺貨
「日本製」三個字係普遍港人心目中嘅信心保證，但日本發生地震及核輻射危機，導致日本貨源短缺，除咗食品外，日本家庭電器及影音產品將成為重災區。同日本做咗幾十年生意嘅信興集團副主席蒙德揚（David）就話毋須太緊張，因為現時仲有電器存貨可賣，只係影音產品貨源開始緊張，但要等日本廠房復工後才恢復來貨。
日廠房無受破壞
日本發生九級地震前兩日，David正身在日本開會，亦喺地震前返回香港，但佢無覺得自己行運，反而替當地災民擔心，所以佢即時打電話過去問候啲生意夥伴，好彩大家都平安，而廠房亦無受破壞，但復工仲需要一段時間，事關要搵專人檢查過所有生產儀器才能恢復生產。卓妮聽聞唔少年輕人都關心影音器材無得賣，唔知有幾大影響呢？
David坦言，影音器材供應確係有啲緊張，但佢呼籲大家真係有需要先至買，至於其他電器就仲有存貨，唔使心急入貨。其實David早前去日本都係同嗰邊研究新一季貨品，但今次發生咁大件事，佢話唔可以只顧自己利益，加上對日本人工作態度好有信心，所以都唔會追貨，總之大家安全最緊要喎。