中環出更：陳細潔買大酒杯點綴家居
品味，由生活出發。家居擺設，最反映個人心思。保良局總理「鯊魚女」陳細潔（Abbie）係紅酒發燒友，家中收藏法國佳釀逾千支，就連屋企擺設都離不開酒杯，充分散發個人獨特品味。
卓妮早前喺銅鑼灣時代廣場高級百貨「連卡佛」（Lane Crawford）遇見Abbie逛街Shopping，時值傍晚時分，放工後嘅Abbie睇嚟心情輕鬆，同女性友人集中火力睇家居用品，見到晶瑩剔透嘅高級玻璃及水晶擺設，更望到眼都唔眨。
Abbie睇中一隻有半個人咁高嘅玻璃酒杯，二話不說舉起佢，擺出乾杯姿勢，表現鬼馬，氹得友人笑咔咔。咁開心，一於將歡樂帶返屋企，扑錘買夠一對杯，盛惠二千六百元。卓妮八到，隻玻璃酒杯喺波蘭生產，由藝術家以全人手製造，每隻杯獨一無二。
獵獲心頭好，Abbie嫌未夠喉，四圍
吓新潮擺設。睇見一個如面盆般大嘅圓框，企定定細心研究，店員上前解釋，原來係一把由英國出品嘅無扇葉風扇，設計師將時尚同家居電器二合為一，潮到極。難怪Abbie睇到入晒神，更伸隻手入圓框內感受吓風力，但最後都係決定唔買，八卦吓算嘞。
裝紅酒水松塞
卓妮上前同Abbie打招呼，問佢點解咁好興致睇家居擺設？Abbie話，向來鍾意擺玻璃裝飾點綴家居，可惜早前唔小心打爛一隻巨型杯，惟有買夠兩隻補數。咁大隻杯，唔通係用嚟裝紅酒？非也，係裝紅酒水松塞至真。Abbie話，開酒招呼朋友後，最鍾意將水松塞儲起嚟，放喺巨型杯內作裝飾，一舉兩得。
卓妮