好好笑！真係超好笑！身為政府智囊嘅中央政策組，居然委託中文大學做一項民意調查，二十四條戇居問題之中居然包括「是否信任曾蔭權」以及「曾俊華應否為預算案下台」。哈哈哈哈，倒米成咁，難怪中策組首席顧問劉兆佳之前講過香港已經到達「臨界點」啦，事關連自己友都玩叛變！
唉吔，幾乎講漏一點，中策組呢一個係秘密民調，亦即係鬼鬼祟祟嗰隻。功夫茶諗諗下覺得唔對路，莫非有人密謀想暗中推翻孖曾？如果係咁就大鑊咯，曾氏宗親會恐怕樹倒猢猻散，其他曾姓一族例如警隊一哥或者德成局長勢必危危乎。
講開劉兆佳提出嘅「臨界點」，呢單嘢又係非常之咁搞笑。事緣財爺曾俊華推出預算案引發萬人示威，派錢派到天怒人怨，劉首席就話嘞，香港已經出現「臨界點」，隨時爆煲咁解；點不知一個屈尾十，劉兆佳反口喎，否認講過「臨界點」。唉，傳媒有錄音o架，點到你唔認呀？表現反智成咁，似乎冇乜資格做智囊喎，唔叫你一聲臭皮囊都算畀面啦！
當然啦，自己友玩叛變係一回事，曾俊華應否為預算案下台又係另一回事。計功夫茶話齋，曾俊華實實在在應該下台，只不過劉兆佳之流嘅官場中人最好收聲，唔好令人產生一個眾叛親離嘅印象咁鬼死肉酸吖嘛。
不如睇睇另外一個唔係秘密進行嘅民調先啦。香港大學民意研究計劃發現，市民對曾俊華支持度評分，對比預算案公布當日大幅下跌五點八分，降到只有四十六點六分，係就任財政司司長以來嘅歷史新低。曾俊華現時民望淨值係負六，對比發表預算案前嘅正三十四，狂瀉四十個百分點！
民意已經火藥味濃嘞，你估官場前輩又點講吖嗱？
自從二○○三年至今離任八年嘅前財爺梁錦松終於忍無可忍，破天荒開腔評論預算案同埋財政政策，不點名批評曾俊華派錢六千銀嘅補鑊措施缺乏針對性，並且「只幫得一時」，無助基層市民自力更生真正扶貧。阿松又暗批預算案對提升香港競爭力及加強教育培訓欠缺長遠目光，認為政府仲有好多要改善嘅地方。
連理應「不在其位、不謀其政」嘅前輩都睇唔過眼要點醒後輩，你話醜唔醜吖？功夫茶記得梁錦松曾經講過，與其送人一條魚，不如教人去釣魚，真係至理名言o架。曾俊華完全缺乏前輩風範，不但冇教人去釣魚，即使送魚都送到一塌糊塗，亂七八糟嘅送魚政策激嬲全村人。所以話啫，曾俊華應該下台。
至於倒米嘅中央政策組，摺埋佢啦！