中環出更：鄭泳舜又要派雪茄
今年名人圈特別旺添丁，卓妮又聽到個喜訊，就係啱啱獲委任做社會投資共享基金委員會成員嘅深水埗區議員鄭泳舜（Vincent）再做爸爸，佢太太胡可兒臨盆在即，已知道係一名男嬰。卓妮問已是兩子之父嘅Vincent，會否想追番個囡囡，佢話同太太都覺得仔同女都無所謂，而Vincent爸爸、保良局副主席鄭錦鐘都話再做爺爺感到好開心。
生埋細仔「收爐」
其實Vincent早前同太太去照超聲波，已知呢胎又係要派雪茄朱古力，但佢話一啲都唔介意，因為仔或女都係自己嘅骨肉，所以佢同太太都已經有晒共識，等細佬出咗世之後，就正式收爐。
Vincent話，太太預產期喺一至兩星期後，準備去九龍塘浸會醫院接生，鄭家上下已經做好準備，齊齊高興迎接新生命嘅來臨。至於呢個細仔將會改乜名，Vincent話依家仲未諗到喎！
Vincent自從○七年當選區議員後，十分關注地區基層工作，加上自己有兩個仔，令佢都關注本港教育發展，順理成章做咗民建聯嘅教育政策副發言人，曾經關注過學童書包過重、貧窮家庭上網費及書簿費問題，愈做愈投入。