中環耳目：鍾志平帶團「香港築地」擦餐飽
工業總會副主席鍾志平（Roy）識飲識食，經常周圍去發掘香港地道美食。最近阿Roy就喺香港仔搵到間地道嘅海鮮餐廳，間餐廳並冇美輪美奐嘅裝修，但勝在魚獲新鮮兼即場炮製，食到眾人讚不絕口。阿Roy落力推介話：「香港都有築地漁市場，使乜去日本喎！」
搵到間咁正嘅海鮮餐廳，阿Roy早前就邀請一班工業家老友去擦餐飽，包括雅芳婷老闆許章榮、德國寶董事長陳國民、萬利玩具老細陳明耀、藍盒國際副主席楊子江、香港玩具協會主席丁煒章、職業訓練局才晉高等教育學院長黃倩瑛、工總行政總裁邱達宏等，場面非常熱鬧。
當日佢哋叫咗成枱美食，包括濃郁鮮甜嘅招牌煲魚湯、凍
魚及豉汁蒸馬友，大家都食到舔舔脷，就算係冇乜烹調技巧嘅灼海中蝦，蝦肉新鮮彈牙已經攞晒分。美食當前，眾人無所不談，情緒高漲。酒足飯飽後，甜品竟然係奶茶及西多士，出品夠晒傳統，大家都讚估唔到咁好味。