中環出更：蔡氏姊弟巡錶舖唔係玩
本港鐘錶業薪火相傳，唔少家族生意已由第二、三代接棒，業界父子兵比比皆是。最近商界就多咗對年輕組合，就係「玩具大王」旭日集團主席蔡志明嘅公子蔡加讚（Karson）同家姊蔡加怡（Crystal）。卓妮早幾日早上十一點幾路過中環干諾道中，就遇見佢哋兩姊弟喺中環喜運佳錶行巡舖，勤力又認真，絕非玩玩吓。
諗計賺財爺粒糖
Karson原本負責睇住玩具生意，Crystal就負責地產業務，但蔡志明去年十一月收購喜運佳之後，又派兩姊弟一齊睇埋呢盤生意。Crystal話，初初對鐘錶感到生疏，但零售業相對其他行業始終簡單啲，做咗排已經順手好多。喜運佳下一步要發展靚舖，熟悉地產嘅Crystal梗駕輕就熟啦！Karson亦愈做愈上手，佢話財爺向市民大派六千蚊，佢哋會諗吓以此作招徠，催谷吓中價錶市場，Karson腦筋轉得認真快。
鐘錶界年度盛事「巴塞爾鐘錶展」（Basel World）快將喺瑞士登場，Karson同Crystal都會去朝聖，到時要決定訂購未來一年嘅貨。咁大單生意，Karson顯得好淡定，皆因作為老行尊嘅喜運佳執董梁青華都會去助陣。華哥話，佢已經去過廿幾年啦！至於準備咗幾多「彈藥」，Karson笑而不語。
講起收藏名錶，蔡家上下都係愛錶之人。蔡志明曾自爆珍藏多達幾百隻名錶，雖然Karson冇爸爸咁誇張，但都有廿幾三十隻，最鍾意運動型嘅大錶。當日蔡志明預訂嘅Roger Dubuis三十六卡方形鑽錶已抵港，全球僅此一隻，售價達五百九十二萬元。兩姊弟一於先睹為快，見佢哋把玩研究個樣，好似睇緊玩具咁得意。