財爺曾俊華喺「史上最廢」嘅預算案中提出向打工仔嘅強積金戶口注資六千蚊，惹來劣評如潮，激起民怨不特止，全港市民更加對強積金嘅新仇舊恨一併挖出嚟炮轟，雖然呢個建議最後不敵民怨而跪低，但積金局就無辜辜做咗箭靶，畀市民大眾鬧鑊甘。
據聞，政府喺舊年十二月已向積金局高層落柯打，話預算案會宣布向打工仔注資強積金，諗住早兩年積金局有注資經驗，要積金局搞掂佢，積金局惟有頂硬上。點知財爺一宣布後卻自吃苦果，引起全民公憤。
積金局行政總監陳唐芷青尋日同傳媒聚會時就話，依家雖然唔使搞注資叫做輕鬆咗，但呢個建議就令市民大眾將對強積金嘅新仇舊恨拎晒出嚟鬧，又話回報低、又話基金收費高、又話咁少錢唔夠退休，搞到佢哋要急急解畫，話畀大家知，十年嚟其實打工仔嘅強積金係有實質回報嘅。
身兼行政會議成員嘅積金局主席胡紅玉就有感而發，話政府有咁多儲備，應該諗下每年撥出一定百分比出嚟分畀市民。
另外，每個市民就應該設立一個政府專用戶口，用嚟派錢又好，第時用嚟搞醫療保險又好，點都會有作用。